Cambodian Jasmine Rice Wins the 'World’s Best Rice' Award at the TRT World Rice Conference two years in the row; 2012 in Indonesia and in Hong Kong 2013
អង្ករកម្ពុជាឈ្នះពានរង្វាន់ “អង្ករល្អជាងគេនៅលើពិភពលោកប្រចាំឆ្នាំ២០១២” នៅប្រទេសឥណ្ឌូនេស៊ី
ភ្នំពេញ ប្រទេសកម្ពុជា ថ្ងៃទី១ ខែតុលា ឆ្នាំ២០១២ - អង្ករផ្កាម្លិះគុណភាពខ្ពស់របស់កម្ពុជា បានឈ្នះពានរង្វាន់ “អង្ករល្អបំផុតនៅលើពិភពលោក” នៅក្នុងការប្រកួតរសជាតិអង្ករអន្ដរជាតិ នៅពិធីសន្និបាតអង្ករពិភពលោក World Rice Conference (WRC) រៀបចំដោយ The Rice Trader (TRT) នៅបាលី ឥណ្ឌូនេស៊ី ចាប់ពីថ្ងៃទី២៦ ដល់២៨ខែកញ្ញាឆ្នាំ២០១២។
សន្និបាតអង្ករពិភពលោករបស់ TRT នេះ គឺជាការប្រមូលផ្ដុំប្រចាំឆ្នាំនូវអ្នកអាជីពក្នុងឧស្សាហកម្មអង្ករ ជាមួយរបៀបវារៈដែលមានគោលបំណងចង់កំណត់ទិសដៅនាពេលអនាគតសម្រាប់ទីផ្សារអង្ករ និងនិន្នាការនៃតម្លៃផងដែរ។ TRT WRC 2012 គឺជាការប្រមូលផ្ដុំធំជាងគេនៃអ្នកជំនាញលើអង្ករប្រចាំតំបន់ ដែលបានទាក់ទាញប្រតិភូ៤០០មកពីទូទាំងពិភពលោក ព្រមទាំងវាគ្មិនជាច្រើនរូបផងដែរ។ ប្រតិភូតំណាងអ្នកនាំចេញអង្ករកម្ពុជាចំនួន១២ ក៏បានចូលរួមក្នុងសន្និបាតនេះផងដែរ។
លោក ដេវីដ សុខ មកពីក្រុមហ៊ុន Golden Rice Cambodia ដែលជាក្រុមហ៊ុនកិននិងនាំចេញស្រូវមួយដែលឈានមុខគេនោះ បានឲ្យដឹងថាៈ “ប្រទេសដែលឈានមុខគេក្នុងការផលិតស្រូវមួយចំនួនបានចូលរួម ក្នុងការប្រកួតរសជាតិអង្ករអន្ដរជាតិនេះ។ ក្រុមអ្នកជំនាញ និងចុងភៅលំដាប់ផ្កាយ៥ប្រចាំនៅបាលីជាច្រើនរូប បានធ្វើការភ្លក់ហើយជ្រើសរើសអង្ករកម្ពុជា ជាអង្ករល្អបំផុត”។ “ផ្អែកលើការពិភាក្សាមុនពេលធ្វើដំណើរទៅកាន់បាលី រវាងក្រុមហ៊ុនដែលបានចូលរួមនោះ យើងបានសម្រេចយកគំរូអង្ករកម្ពុជាបីប្រភេទ ដើម្បីចូលរួមប្រកួត TRT competition គឺអង្ករក្រអូបពីរប្រភេទ (premier fragrant rice) និងអង្ករសមួយប្រភេទ (premier white rice)។ គំរូអង្ករដែលបានទទួលរង្វាន់នោះ គឺនៅក្នុងចំណោមអង្ករក្រអូបពីរប្រភេទនោះ គឺអង្ករផ្កាម្លិះ លំដាប់ A ១០០% មិនបែក”។
លោកបានបន្ថែមទៀតថាៈ “យើងសូមថ្លែងអំណរគុណយ៉ាងជ្រាលជ្រៅដល់ International Finance Corporation (IFC) ដែលបានផ្ដល់ជាដំបូន្មានផ្នែកបច្ចេកទេស ដល់ក្រុមហ៊ុននាំចេញទាំង១២ និងបានជួយសម្រួលដល់ការចូលរួមរបស់យើងផងដែរ។ ហើយពានរង្វាន់នេះ នឹងបង្ហាញពិភពលោកថាកម្ពុជាមានអង្ករគុណភាពខ្ពស់ និងអាចប្រកួតប្រជែងជាមួយប្រទេសសំខាន់ៗដទៃទៀត។”
លោកចាន់ ពេជ្រ មកពីក្រុមហ៊ុន Signature of Asia ដែលជាក្រុមហ៊ុននាំចេញអង្ករដែរនោះ បានឲ្យដឹងថាៈ “អ្នកនាំចេញអង្ករកម្ពុជាដែលបានចូលរួមទាំងអស់ មានភាពសប្បាយរីករាយនិងមានមោទនភាពណាស់ នៅពេលដែលគណៈកម្មការជំនាញបានប្រកាសថាអង្ករកម្ពុជាបានឈ្នះ ពានរង្វាន់អង្ករល្អបំផុតនៅលើពិភពលោក ក្នុងឆ្នាំនេះ”។ “ខ្ញុំគិតថានេះគឺជាជោគជ័យមួយដ៏ធំសម្រាប់ឧស្សាហកម្មអង្ករកម្ពុជា និងសម្រាប់ប្រទេសកម្ពុជាទាំងមូលផងដែរ”។
នៅក្នុងសន្និបាតអង្ករពិភពលោកនេះ មានការរៀបចំកម្មវិធីប្រកួតរសជាតិអង្ករ ដែលមានការចូលរួមពីប្រទេសជាច្រើន។ អង្ករថៃបានឈ្នះ ក្នុងឆ្នាំ២០១០ ហើយអង្កររបស់ភូមា បានឈ្នះនៅឆ្នាំ២០១១។ គេជឿថា ពានរង្វាន់លំដាប់ពិភពលោករបស់អង្ករកម្ពុជា នឹងជួយព្រះរាជាណាចក្រនេះ បង្កើនការនាំចេញ ដោយការផ្សព្វផ្សាយនៅលើទីផ្សារអន្ដរជាតិ ជម្រុញឲ្យឈ្មួញនិងអ្នកលក់អន្ដរជាតិពិចារណាទិញអង្ករកាន់តែច្រើនពីប្រទេសកម្ពុជា និងបានជួយសម្រេចគោលដៅរបស់រដ្ឋាភិបាលកម្ពុជាផងដែរ ក្នុងការនាំចេញអង្ករឲ្យបាន១លានតោនក្នុងឆ្នាំ២០១៥។
ប្រភពៈhttp://www.worldsbestrice2012.com/TRTWRC12.html
English
ភាសាខ្មែរ